बढ्दो सार्वजनिक विरोधबीच रुसी प्रशासन क्रेमलिनले युक्रेनमा लड्न आफ्ना नागरिकहरुलाई परिचालन गर्ने निर्णयमा केही त्रुटि भएको संकेत गरेको छ ।
अन्तर्राष्ट्रिय समाचार संस्था एएफपीका अनुसार रुसी राष्ट्रपति भ्लादिमिर पुटिनका प्रवक्ताले गल्ति भएको संकेत गर्दै त्यसलाई सच्च्याइने बताएका छन् । क्रेमलिनका प्रवक्ता दिमित्री पेस्कोभले भने, “केही गल्तीहरु भएका छन् र अवस्थाको सुधारका लागि क्षेत्रीय गभर्नरहरुले काम गरिरहेका छन् ।’’ पुटिनले गत साता युक्रेनमा लड्नका लागि ३ लाख रुसी नागरिकलाई परिचालन गर्ने आदेश दिएका थिए ।
तर, धेरै सैन्य अनुभव नभएका र असक्षम व्यक्तिलाई पनि परिचालनको तयारी गरिएको विभिन्न रिपोर्टमा जनाइएको थियो । परिचालनको विरोधमा रुसभर विरोध प्रदर्शनको आयोजना गरिएको छ । प्रदर्शनमा हस्तक्षेप गर्दै प्रहरीले हजारौँ प्रदर्शनकारीलाई नियन्त्रणमा लिएको छ । पुटिनले जगेडा सैनिकलाई परिचालन गर्न दिएको आदेशले रुसी सेनाहरू युक्रेनको युद्धभूमिमा नराम्ररी असफल भइरहेको देखाएको पश्चिमा मुलुक एवम् युक्रेनका सैन्य विशेषज्ञहरुले टिप्पणी गरेका छन् । रुसले युक्रेनमाथि हमला सुरु गरेको सात महिनाभन्दा धेरै भएको छ ।
त्यस्तै, पेस्कोभले रुसको सीमा बन्द नभएको समेत स्पष्ट पारेका छन् । हालसम्म रुसले आफ्नो सीमा बन्द गर्नेबारे कुनै निर्णय नगरेको पेस्कोभले बताएका हुन् । पुटिनले आशिंक सैनिक परिचालनको घोषणा गरेसँगै पछिल्लो समय रुस छाडेर विदेश जानेको सङ्ख्या ह्वात्तै बढेको बताइएको छ । अन्तर्राष्ट्रिय सञ्चारमाध्यमले सार्वजनिक गरेका तस्वीर एवम् भिडियोहरुमा रुसको सीमा नाकामा देश छाड्न चाहने मानिसहरुको लामो लाइन देख्न सकिन्छ ।
यसैबीच, रुसमा विलय हुन स्वघोषित ‘जनमत संग्रह’ को लागि मत संकलन गर्न रुसी कब्जामा रहेका युक्रेनी भूभागमा रुसी सशस्त्र बल घर–घर पुगेका छन् । दक्षिणी खेरसनमा मत संकलन गर्न रुसी सुरक्षाकर्मीहरू सहरको बीचमा मतपेटिका लिएर उभिएका बताइएको छ ।
प्रतिक्रिया लेख्नुहोस्