नागरिक उन्मुक्ति पार्टीका संरक्षक रेशम चौधरी बुधबार दिउँसो काठमाडौंको प्रज्ञा भवन परिसरबाट पक्राउ परेका छन्। जनमत पार्टीसँगको प्रस्तावित एकता कार्यक्रमको पूर्वसन्ध्यामा चौधरीलाई प्रहरीले नियन्त्रणमा लिएको हो।
स्रोतका अनुसार चौधरी पार्टी एकीकरणसम्बन्धी कार्यक्रममा सहभागी हुन प्रज्ञा भवन पुगेका बेला उनलाई प्रहरीले पक्राउ गरेको हो। २०७२ साल भदौ महिनामा टीकापुरमा भएको हिंसात्मक घटनामा संलग्न भएको अभियोगमा रेशम चौधरीलाई अदालतले जन्मकैदको सजाय सुनाएको थियो। त्यस फैसलापछि उनी लामो समय कारागारमा बसेका थिए। तर २०८० सालको गणतन्त्र दिवसको अवसरमा नेपाल सरकारले विशेष सिफारिस गर्दै चौधरीलाई आममाफीको सूचीमा समावेश गर्यो। सो सिफारिसअनुसार राष्ट्रपतिको निर्णयले उनी कारावासमुक्त भएका थिए।
तर, रेशम चौधरीको आममाफीपछि उनको रिहाइ भएको भोलिपल्टै टीकापुर घटनाका पीडित पक्षबाट सर्वोच्च अदालतमा कानुनी चुनौती प्रस्तुत गरिएको थियो। घटनामा ज्यान गुमाएका प्रहरी निरीक्षक केशव बोहोराका परिवार तर्फबाट उनकी पत्नी शारदा कडायतले राष्ट्रपतिको माफी विरुद्ध रिट निवेदन दर्ता गरेकी थिइन्।
टीकापुर घटनासम्बन्धी मुद्दामा सर्वोच्च अदालतबाट थुनामा राख्नुपर्ने आदेश जारी भएकाले सोही आदेश कार्यान्वयनको प्रक्रियाअन्तर्गत रेशम चौधरीलाई पक्राउ गरिएको बताइएको छ।
प्रतिक्रिया लेख्नुहोस्