रुस डोनबास क्षेत्रलाई ध्वस्त पार्न उद्दत रहेको जेलेन्स्कीको टिप्पणी

युक्रेनी राष्ट्रपति भोलोदिमिर जेलेन्स्कीले रुस आफ्नो मुलुकको पूर्वी डोनबास क्षेत्र ध्वस्त पार्न उद्दत रहेको टिप्पणी गरेका छन् । नियमित भिडियो सन्देश जारी गर्दै राष्ट्रपति जेलेन्स्कीले रुस युक्रेनको डोनबासलाई ध्वस्त पार्न उद्दत रहेको टिप्पणी गरेका हुन् ।

‘डोनबासमा हवाई एवम् तोपखानाबाट विशाल हमलाहरु भइरहेका छन् । आक्रमणकारीको उद्देश्य फेरिएको छैन, उनीहरु डोनबासलाई विस्तारै ध्वस्त पार्न चाहन्छन् ।’ जेलेन्स्कीलाई उद्धृत गर्दै बीबीसीले जनाएको छ । उनले आफ्नो सैन्य बललाई भारी हतियार र तोपखाना प्रणालीको आपूर्तिलाई तीव्रता दिन पश्चिमा नेताहरुलाई आग्रह समेत गरे । ‘हामी बारम्बार युक्रेनमा हतियारको आपूर्तिलाई तीव्रता दिन जोड दिइरहेका छौँ ।’ उनले भने ।

पछिल्लो समय रुसी सेनाले पूर्वी युक्रेनको सेभेरोडोनेत्स्क र लिसिचान्स्क सहरमा आक्रमणलाई तीव्र पारेको जनाइएको छ । लुहान्स्क क्षेत्रमा अवस्थित यी दुई सहर युक्रेनी फौजको नियन्त्रणमा रहेको अन्तिम पकड क्षेत्र हुन् ।