प्रा. डा. गोविन्द केसीले काठमाडौं विश्वविद्यालय (केयू) को उपकुलपति छनोट प्रक्रिया कुनै पनि राजनीतिक वा निजी स्वार्थबाट प्रभावित हुन नहुने बताएका छन् । उपकुलपति पदका लागि अल्पसूचीमा परेका उम्मेदवारहरूको अन्तर्वार्ता सुरु हुनुअघि उनले विज्ञप्ति जारी गर्दै निष्पक्ष र पारदर्शी छनोटको माग गरेका हुन् ।
डा. केसीले राजनीतिक दल वा निजी क्षेत्रसँग आबद्ध तथा स्वार्थ बाझिने व्यक्तिलाई विश्वविद्यालयको नेतृत्वमा नियुक्त गरिए त्यसको कडा प्रतिवाद गर्ने चेतावनी दिएका छन् । उनका अनुसार विश्वविद्यालयको नेतृत्व योग्य, स्वतन्त्र र निष्पक्ष व्यक्तिले नै सम्हाल्नुपर्छ ।
हाल दार्चुलाको व्यास गाउँपालिका–स्थित छाङ्ग्रुमा निःशुल्क स्वास्थ्य शिविर सञ्चालन गरिरहेका डा. केसीले साउन ११ गते २४औँ सत्याग्रहका क्रममा सरकारसँग भएका सहमतिहरू अक्षरशः कार्यान्वयन गर्न पनि सरकारलाई आग्रह गरेका छन् ।
उनले सरकारले माफियाको दबाबमा परेर सहमति उल्लङ्घन गरे, निजी मेडिकल कलेजमा हुने श्रम शोषण, ठगी, आर्थिक अनियमितता तथा अन्य अपराधको छानबिन र कारबाही नगरे, साथै आवासीय चिकित्सकहरूको निर्वाह भत्ता घटाए स्थगित गरिएको २४औँ सत्याग्रहसहितको आन्दोलन पुनः सुरु गर्न बाध्य हुने चेतावनी दिएका छन् ।
उपकुलपति पदका लागि अल्पसूचीमा दयाराम पोखरेल, बालचन्द्र लुइँटेल, विकास नकर्मी, बिमप्रसाद श्रेष्ठ, राजेन्द्र जोशी, विवेक बराल, शेषानन्द सञ्जेल, सुवोध शर्मा, हरिप्रसाद न्यौपाने र निरञ्जन पराजुली रहेका छन् । यद्यपि पराजुलीले अन्तर्वार्तामा सहभागी नहुने घोषणा गरिसकेका छन् ।
प्रतिक्रिया लेख्नुहोस्