राष्ट्रिय लोक तथा दोहोरीगीत प्रतिष्ठान नेपालको अध्यक्षमा पशुपति शर्मा निर्विरोध निर्वाचित भएका छन् । प्रतिष्ठानको महाधिवेशनमा अध्यक्ष पदमा शर्माको मात्र उम्मेदवारी परेपछि उनी निर्विरोध चयन भएका हुन् ।
निर्वाचन समितिले सार्वजनिक गरेको अन्तिम नामावलीअनुसार वरिष्ठ उपाध्यक्षमा दीपक खड्का, प्रथम उपाध्यक्षमा सुवास केसी तथा द्वितीय उपाध्यक्षको सांगठनिकतर्फ राजु ढकाल र प्रशासनिकतर्फ रमेशराज भट्टराई पनि निर्विरोध निर्वाचित भएका छन् ।
अध्यक्षसहित केही पदमा निर्विरोध चयन भइसके पनि प्रतिष्ठानको बाँकी पदाधिकारी तथा केन्द्रीय सदस्यका लागि आज मतदान हुँदैछ । निर्वाचन समितिले सार्वजनिक गरेको नामावलीअनुसार प्रतिस्पर्धा हुने पदमा मतदानमार्फत नेतृत्व चयन गरिनेछ ।
शर्मा यसअघि प्रतिष्ठानको वरिष्ठ उपाध्यक्षका रूपमा कार्यरत थिए । नेपाली लोकसंगीतमा लामो समयदेखि सक्रिय उनी मौलिक लोकभाका, व्यङ्ग्यात्मक प्रस्तुति र जनजीवनसँग जोडिएका गीतका कारण परिचित छन् ।
प्रतिक्रिया लेख्नुहोस्