जारी फिफा विश्वकपको सेमिफाइनल समीकरण पूरा भएको छ। अब फाइनल प्रवेशका लागि पहिलो सेमिफाइनलमा फ्रान्सले स्पेनसँग तथा दोस्रो सेमिफाइनलमा इङ्ग्ल्यान्डले अर्जेन्टिनासँग प्रतिस्पर्धा गर्नेछन्।
पहिलो सेमिफाइनल डलास रंगशालामा फ्रान्स र स्पेनबीच हुनेछ भने दोस्रो सेमिफाइनल एटलान्टा रंगशालामा इङ्ग्ल्यान्ड र अर्जेन्टिनाबीच खेलिनेछ।
क्वार्टरफाइनलमा फ्रान्सले मोरक्कोलाई तथा स्पेनले बेल्जियमलाई पराजित गर्दै अन्तिम चारमा स्थान सुरक्षित गरेका हुन्। फ्रान्स र स्पेनबीच यो ३६औँ भेट हुनेछ। विश्वकपको फाइनल प्रवेशका लागि हुने यस प्रतिस्पर्धामा विगतका नतिजाले पनि विशेष चासो बढाएको छ।
हालका वर्षहरूमा फ्रान्सले स्पेनमाथि लगातार सफलता हात पारेको छ। फ्रान्सले सन् २०२४ को युरोपेली च्याम्पियनसिपको सेमिफाइनलमा स्पेनलाई २–१ ले पराजित गरेको थियो। त्यसपछि सन् २०२५ को राष्ट्र लिगमा पनि फ्रान्सले स्पेनलाई ५–४ ले हराएको थियो। यसपटक भने स्पेन ती हारको बदला लिँदै विश्वकपको फाइनलमा पुग्ने लक्ष्यमा हुनेछ।
विश्वकपमा यी दुई टोलीबीच यसअघि एकपटक मात्र भेट भएको थियो। सन् २००६ को विश्वकपको नकआउट चरणमा जिनेदिन जिदानको नेतृत्वमा रहेको फ्रान्सले स्पेनलाई ३–१ ले पराजित गरेको थियो।
युरोपेली च्याम्पियनसिपमा भने दुवै टोली पाँचपटक आमनेसामने भएका छन्। सन् १९८४ को फाइनलमा फ्रान्सले स्पेनलाई २–० ले हराउँदै उपाधि जितेको थियो। सन् २०१२ को क्वार्टरफाइनलमा स्पेन २–० ले विजयी भएको थियो भने सन् १९९६ मा खेल १–१ को बराबरीमा सकिएको थियो। सन् २००० को क्वार्टरफाइनलमा फ्रान्सले २–१ को जित निकालेको थियो।
फ्रान्सले यस विश्वकपमा स्विडेन, पाराग्वे र मोरक्कोलाई पराजित गर्दै सेमिफाइनल यात्रा तय गरेको हो। यता, युरोपेली च्याम्पियन स्पेनले अस्ट्रिया, पोर्चुगल र बेल्जियमलाई हराउँदै अन्तिम चारमा स्थान बनाएको छ। यस खेलमा फ्रान्सका स्टार फरवार्ड किलियन एम्बाप्पे र स्पेनका युवा प्रतिभा लामिन यामालबीचको प्रतिस्पर्धा पनि मुख्य आकर्षण रहने अपेक्षा गरिएको छ।
यता, दोस्रो सेमिफाइनलमा इङ्ग्ल्यान्ड र अर्जेन्टिना आमनेसामने हुँदैछन्। विश्वकपमा यी दुई टोलीबीचको प्रतिस्पर्धा इतिहास, विवाद र रोमाञ्चका कारण सधैँ विशेष मानिन्छ।
दुवै टोलीबीचको सबैभन्दा चर्चित भेट सन् १९८६ को विश्वकपको क्वार्टरफाइनलमा भएको थियो, जहाँ अर्जेन्टिनाले डिएगो म्याराडोनाको दुई ऐतिहासिक गोलको मद्दतमा इङ्ग्ल्यान्डलाई पराजित गरेको थियो। तीमध्ये एउटा ‘ईश्वरको हात’ नामले चर्चित गोल थियो भने अर्को गोललाई विश्व फुटबल इतिहासकै उत्कृष्ट गोलमध्ये एक मानिन्छ।
त्यसको चार वर्षपछि सन् १९९० को विश्वकपको क्वार्टरफाइनलमा पनि यी दुई टोली आमनेसामने भएका थिए। त्यसबेला अर्जेन्टिनाले पेनाल्टी सुटआउटमार्फत जित निकाल्दै सेमिफाइनलमा स्थान बनाएको थियो।
विश्व फुटबलका दुई शक्तिशाली टोलीबीचको यो प्रतिस्पर्धा केवल खेलमा मात्र सीमित नभई राष्ट्रिय गौरव, प्रतिष्ठा र ऐतिहासिक प्रतिद्वन्द्वितासँग पनि जोडिएको मानिन्छ। त्यसैले यसपटकका दुवै सेमिफाइनल विश्वकपकै सबैभन्दा प्रतिक्षित खेलमध्ये पर्ने अपेक्षा गरिएको छ।
प्रतिक्रिया लेख्नुहोस्