चलचित्र ‘बाटुलो जून’को टिजर सार्वजनिक भएको छ । निर्माण कम्पनी सनराइज पिक्चरले चलचित्रको प्रचारप्रसारलाई गति दिने उद्देश्यसहित पहिलो दृश्य-सामग्री दर्शकमाझ ल्याएको हो ।
उक्त चलचित्र ३० को दशकको आदर्श प्रेमकथामा आधारित चलचित्र हो । यसले तत्कालीन सामाजिक परिवेश, जीवनशैली र प्रेम गर्ने तौरतरिकालाई पर्दामा उतारेको छ । अहिलेको प्रविधिमैत्री र तीव्र गतिको प्रेमभन्दा नितान्त फरक, त्यही पुरानो समयको सुगन्धलाई चलचित्रको कथानकमा समेटिएको छ ।
चलचित्रको निर्देशन भुवन केसीले गरेका हुन् । यसअघि ‘ड्रिम्स’मार्फत आधुनिक प्रेमकथा पस्किएका उनले यसपटक भने आफ्नै अभिनय यात्राको स्वर्णिम समयलाई पर्दामा पुनर्जीवित गर्ने प्रयास गरेका छन् । यो चलचित्र पुरानो समयको कथा मात्र नभएर भुवन केसीको आफ्नै सिनेमा यात्राको संवेदनासँग पनि जोडिएको छ ।
चलचित्रमा अनमोल केसीको मुख्य र भुवन केसीको महत्वपूर्ण भूमिका छ । यही चलचित्रमार्फत प्रिन्सी खतिवडाले डेब्यु गरेकी छन् भने बेल्जियममा बस्दै आएकी अभिनेत्री गरिमा पन्तले पनि नेपाली रजतपटमा पुनरागमन गरेकी छन् ।
सामीप्यराज तिमल्सेना र सरिन पोखरेलको लेखन रहेको यो चलचित्र आगामी कात्तिक २६ गतेबाट प्रदर्शनमा आउँदैछ । जिया केसी र भविष्य खड्का निर्माता तथा विवेक थापा सह-निर्माता रहेको ‘बाटुलो जून’मा राजेश श्रेष्ठको छायांकन, कृष्ण भण्डारीको सम्पादन, रोमन बज्राचार्यको पार्श्व संगीत र प्रदीप श्रेष्ठको एसोसिएट निर्देशन रहेको छ ।
प्रतिक्रिया लेख्नुहोस्