कर्णाली प्रदेशको मुख्यमन्त्रीमा नेपाली कम्युनिस्ट पार्टी (नेकपा) संसदीय दलका नेता मंगलबहादुर शाही नियुक्त भएका छन्। प्रदेश प्रमुख यज्ञराज जोशीले नेपालको संविधानको धारा १६८ को उपधारा (२) बमोजिम मंगलबार शाहीलाई मुख्यमन्त्री पदमा नियुक्त गरेका हुन्।
मुगुको सोरु गाउँपालिका–६ निवासी शाहीले नेकपाका १४ र एमालेका १० प्रदेशसभा सदस्यको समर्थनसहित सरकार गठनका लागि प्रदेश प्रमुखसमक्ष दाबी पेस गरेका थिए। प्रदेश प्रमुखले उक्त दाबी संविधानअनुकूल रहेको ठहर गर्दै शाहीलाई मुख्यमन्त्री नियुक्त गरेका हुन्।
शाही कर्णाली प्रदेश सरकारका पाँचौँ मुख्यमन्त्री बनेका छन्। उनको पद तथा गोपनीयताको शपथग्रहण बुधबार हुने प्रदेश प्रमुखको कार्यालयले जनाएको छ।
कर्णाली प्रदेशमा नेपाली कांग्रेससँगको सत्ता सहकार्य अन्त्य भएपछि नेकपा र एमालेबीच नयाँ सत्ता समीकरण बनेको हो। सोही राजनीतिक सहमतिअनुसार सरकारको नेतृत्व नेकपाले गर्ने र एमालेले समर्थन गर्ने समझदारी कार्यान्वयनस्वरूप शाही मुख्यमन्त्री बनेका हुन्।
अब मुख्यमन्त्री शाहीले मन्त्रिपरिषद् विस्तार, मन्त्रालयहरूको जिम्मेवारी बाँडफाँट तथा सरकारको साझा न्यूनतम कार्यक्रम सार्वजनिक गर्ने तयारी गर्ने अपेक्षा गरिएको छ।
प्रतिक्रिया लेख्नुहोस्